Duela mende bat baino gehiago deskribatu bazen ere, paratuberkulosiak (PTB) erronka handia izaten jarraitzen du animalien osasunerako. Mycobacterium avium subsp. paratuberculosis bakterioaren eta ostalariaren arteko elkarrekintzak, erantzun immunitarioa, diagnostikoa eta gaixotasunaren epidemiologia hobeto ulertzeko aurrerapenak egin diren arren, PTBak oso hedatuta jarraitzen du. Era berean, gaur egungo kontrol-neurriak ez dira nahikoak izaten edo motelegiak dira emaitza esanguratsuak lortzeko. Horrek agerian uzten du oraindik ere ikerketa-premia handiak daudela, baita gaixotasuna modu eraginkorrean kontrolatzeko erronkak ere.
Europako Batzordeak finantzatutako DISCONTOOLS ekimenak (DISease CONtrol TOOLS) animalien gaixotasun infekzioso nagusiei buruzko sarbide irekiko datu-base bat eskaintzen du. Datu-base hori funtsezko esparrua da ikerketa-lehentasunak identifikatzeko eta kontrol-tresna eraginkorragoen garapena bideratzeko, animalien gaixotasunen eragina murrizteko helburuarekin. Halaber, DISCONTOOLSek ikerketa-agenda estrategikoak zehazten laguntzen du, bai finantzaketa publikoko erakundeentzat, bai erakunde pribatuentzat. Horretarako, aditu-panelek ezagutza-hutsuneen azterketa sistematikoak egiten dituzte, gaixotasun bakoitzerako dauden gaitasunak eta ase gabeko beharrak ebaluatuz. 2024an, Natalia Elguezabal ikertzailearekin harremanetan jarri ziren, aditu gisa, nazioarteko ordezkaritza izango zuen lantalde bat osatu eta zuzentzeko, PTBari eskainitako datu-baseko kapitulua eguneratzeko helburuarekin. Gainera, talde berak literatura zientifikoaren berrikuspen-artikulu bat prestatu zuen, azken aurrerapenak laburbiltzeko, oraindik dirauten ezagutza-hutsuneak nabarmentzeko eta PTBa kontrolatzeko estrategia eraginkorragoak eta jasangarriagoak garatzen lagunduko duten lehentasunezko ikerketa-arloak identifikatzeko.
BMC Veterinary Research aldizkarian argitaratutako artikulua literatura zientifikoaren berrikuspenean eta egileen aditu-ezagutzan oinarrituta dago. Bertan, diagnostikoa, epidemiologia, patogenesia, txertaketa, erresistentzia genetikoa eta terapia alternatiboak bezalako funtsezko arloetan azkenaldian egindako aurrerapenak sintetizatzen dira. Horrez gain, PTBak osasun publikoan izan ditzakeen ondorioak ere aztertzen dira.
Egindako aurrerapenak gorabehera, ezagutza-hutsune handiak daude oraindik. Horrek agerian uzten du kontrol-estrategia eta terapia aurreratuagoak garatu behar direla, hausnarkarien paratuberkulosia modu eraginkorrean kudeatzeko. Horregatik, NEIKERen PTBari buruzko ikerketarekin jarraituko dugu, hainbat proiektu eta doktorego-tesiren bidez.
