Q-Net Assess proiektuaren Europako partzuergoak martxoko hirugarren astean egin zuen urteko azken bilera, Moredun Research Instituteren egoitzan (Edinburgo). Bertan erakunde parte-hartzaileetako 27 ordezkari bildu ziren, eta proiektuaren hiru urteetan egindako aurrerapenak elkarrekin berrikusteaz gain, proiektua amaitu aurretik eman beharreko azken urratsak ere zehaztu zituzten.
Coxiella burnetii Q sukarra eragiten duen bakterioa da. Zoonosi honek mundu mailako hedapena dauka, eta etxeko hausnarkariei eragiten die batez ere. Hausnarkariek pertsonen gordailu eta infekzio-iturri gisa jarduten dute. Animalietan, infekzioa ugalketa-nahasmenduekin lotzen da, hala nola abortuak, mortinatoak, erditze goiztiarrak eta kume ahulen jaiotza. Gizakietan, berriz, modu asintomatikoan edo gripearen antzeko sintoma arinekin ager daiteke, eta pneumonia, hepatitisa edo meningoentzefalitisa eragin ditzake. Hala ere, kasuen ehuneko txiki batek (% 1-5) forma kroniko eta hilgarriak izan daitezkeen formetara eboluzionatzen du (bereziki, infekzio baskularrera edo endokarditisera). C. burnetii isolatzeko eta anduiak landa-laginetatik zuzenean karakterizatzeko zailtasunak direla eta, beharrezkoa da haien dibertsitate genetikoa karakterizatzeko eta patogeno horren Europako zaintza optimizatzeko tresnak garatzea.
Testuinguru horretan, Q-Net Assess proiektuak mikrobiologiako, diagnostikoko, zaintza epidemiologikoko eta genomikako espezialistak biltzen ditu, C. burnetii-ren dibertsitate genetikoari, ostalarientzako egokitzapenari eta haren birulentziari lotutako faktore posibleei buruzko ezagutza zabaltzeko. NEIKERekin batera, partzuergoko kide dira Moredun Research Institute (Erresuma Batua), Royal GD (Herbehereak), ANSES eta INRAE (Frantzia), Sciensano (Belgika) eta FLI (Alemania). Gainera, APHAk (Erresuma Batua) eta DGZ–Animal Health Care Flandersek (Belgika) parte hartzen dute erakunde azpikontratatu gisa, eta AGESek (Austria) kolaboratzaile gisa.
Azken bilera honetan, partzuergoko kideek proiektuaren hainbat esparrutan lortutako emaitza nagusiak partekatu zituzten, besteak beste, genoma osoa isolatzeko eta sekuentziatzeko metodologien optimizazioa, hausnarkarietatik eta gizakietatik datozen lagin positiboen bilketa eta karakterizazioa ostalarira egokitzea eta genotipoen birulentzia aztertzeko, eta C. burnetii Osasun Bakarraren ikuspegitik zaintzeko sare paneuropar baten sorrera. Horrez gain, workshop saio bioinformatiko bat ere egin zen, proiektuaren testuinguruan sortutako genoma osoen analisi bioinformatikoa egiteko lan-fluxuei buruzkoa, sekuentziazio masiboko zenbait teknika erabiliz. Saio horretan, esperientziak trukatu, erronka metodologikoei buruz hitz egin eta jardunbide egokiak partekatu ziren parte hartu zuten taldeen artean.
Bilera honekin, partzuergoak proiektuaren azken faseari ekingo dio, lortutako emaitzen balio zientifikoa eta aplikatua maximizatzeko, bai argitalpenen bidez, bai eta gida zein gomendioen bidez. Baterako lan hori funtsezkoa da herrialdeen artean estandarizatuagoak eta konparagarriagoak diren protokoloetarantz aurrera egiteko eta Europa mailan C. burnetii-ren zaintza molekularra indartzeko.
Ekimena “Q-Net Assess – Improved molecular surveillance and assessment of host adaptation and virulence of Coxiella burnetii in Europe” (PCI2023-143391) proiektuan kokatzen da, MICIU/AEI/10.13039/501100011033 erakundeak finantzatua eta Europar Batasunak kofinantzatua, ERA-NET “Coordinación Internacional de Investigación sobre Enfermedades Animales Infecciosas – ICRAD” Animalien Nazioarteko Ikerketarako Horizonte 2020 pogramaren bidez (Grant Agreement No. 862605).
