Aldaketa globalaren testuinguruan, epidemiologia espaziala eta arriskuaren modelizazioa funtsezko tresnak dira bektoreek transmititutako gaixotasunen agerpena aurreikusteko eta hedapena ulertzeko. Diziplina horiei esker, hainbat determinatzaile integra daitezke, klimatikoak, ekologikoak, paisaiari lotutakoak, sozialak, besteak beste, eta zaintza-lanerako zein erabakiak hartzeko informazio praktiko bihurtu.
Bere doktoradu ondoko ibilbideren barruan, Aitor Cevidanesek, NEIKERreko Animalien Osasun Saileko ikertzaileak, 2025eko iraila eta azaroa bitartean egonaldi bat egin du Oxfordeko Unibertsitateko Geografia eta Ingurumen Sailean ikertzaile bisitari gisa, Janey Messina doktorearen zuzendaritzapean.
Denbora horretan, Aitorrek bektoreek transmititutako gaixotasunen epidemiologia espazialarekin lotutako lan-ildoetan jardun du, bereziki akainetan eta osasun-intereseko beste artropodo batzuetan arreta jarrita. Zehazki, datu espazialak integratu eta aztertzean oinarritu da, bektoreek transmititutako patogenoen modelizazio epidemiologiko eta prediktiboa hobetzeko, eta erreserborioen zein ingurumen- eta klima-faktoreen eginkizuna ebaluatzeko, haien banaketan eta arriskuan duten eragina aztertuz.
Egonaldia honek NEIKERrentzat arriskuaren zaintza eta aurreikuspena indartzeko gaitasun tekniko eta metodologikoak sendotzen laguntzen du, eta, aldi berean, nazioarteko lankidetza-aukerak zabaltzen ditu, klima-aldaketak eta bektoreen zein patogenoen ekologiari eragiten dioten aldaketa globaleko beste prozesu batzuek markatutako testuinguru batean.
Egonaldia Ramón y Cajal kontratuaren (RYC2021-033084-I) finantzaketari esker egin da. Kontratua Aitor Cevidanesi esleitu zitzaion, eta MCIN/AEI/10.13039/501100011033-ek eta Europar Batasunak – NextGenerationEU/PRTR programaren bidez finantzatu dute.
